काठमाडौँ। सडकआश्रित नागरिकहरूको उद्धार, उपचार, संरक्षण र पुनर्मिलनका लागि निरन्तर सक्रिय मानवसेवा आश्रमले चार महिनाअघि उद्धार गरेको ४२ वर्षीय गोपाल तिमिल्सिनाको जीवनमा उल्लेखनीय परिवर्तन आएको छ। तर परिवारका सदस्यसँग सम्पर्क स्थापित हुन नसक्दा उनी घर फर्किन नपाएको आश्रमले जनाएको छ।
तिमिल्सिना अविवाहित हुन्। आमाको मृत्यु र बुबाको दोस्रो विवाहपछि परिवारिक संरचना कमजोर बन्दै गयो। पछिल्लाे अवस्थामा बुबाको पनि निधन भएपछि उनी सानीआमा र दुई भाइसँगै घर सम्हाल्दै आएका थिए। ट्रक चालकको रूपमा काम गर्दै सामान्य जीवन बिताइरहे पनि साथीभाइको लहलहैमा पर्दै गएपछि जाँडरक्सीको लतले उनीलाई क्रमशः कमजोर बनाउँदै लग्यो। रोजगारी र पारिवारिक सम्बन्ध दुवैले च्याप्दै जाँदा उनी घरबारविहीन जीवनतर्फ धकेलिँदै गए।
यतिधेरै कठिनाइका बीच एकदिन मोटरसाइकलले ठक्कर दिएर भागेपछि उनको अवस्था झनै गम्भीर बन्यो। उपचार नपाउँदा शरीरमा चोट लाग्याे। असहाय अवस्थामा बाँच्न बाध्य तिमिल्सिना स्वयम्भू क्षेत्रमा फोहोर फाल्ने स्थानको नालाभित्र बसेको अवस्थामा मानवसेवा आश्रमको रात्रिकालीन सडकसेवा उद्धार टोलीले भेट्यो। शारीरिक रूपमा थला परेका, घाइते शरीर र मानसिक रूपमा कमजोर अवस्थामा भेटिएका उनलाई टोलीले तत्काल उद्धार गरी आश्रम रानीवन शाखामा पु-यायो।
उद्धारपछि आश्रमले चार महिनासम्म नियमित उपचार, पोषिलो आहार, आराम, स्नेह र मनोवैज्ञानिक परामर्श उपलब्ध गरायो। निरन्तर हेरचाहको परिणामस्वरूप तिमिल्सिनाको शारीरिक तथा मानसिक दुवै अवस्थामा उल्लेख्य सुधार आएको छ। हिँडडुल गर्न सक्ने, आफैंलाई सम्हाल्न सक्ने र सामान्य दिनचर्यामा फर्किने अवस्थामा पुगेपछि आश्रमले पारिवारिक पुनर्मिलनका लागि पहल सुरु गर्यो।
तर दुर्भाग्यवश, अहिलेसम्म उनका परिवारका कुनै सदस्यले आश्रमसँग सम्पर्क स्थापना गर्न सकेका छैनन्। परिवार नभेटिँदा चाहेर पनि गोपाल घर फर्किन सकिरहेका छैनन्। घर जाने आशामा रहेका उनी अहिले भने नयाँ जीवनको तयारीमा देखिन्छन्। “अब त एक्लै कति बस्नु ? यसपालि बिहे गर्ने सोच छ,” उनी मुस्कुराउँदै भन्छन्।
मानवसेवा आश्रमले गोपाल जस्तै कठिन परिस्थितिमा परेका, असहाय र बेवारिसे अवस्थामा भेटिएका नागरिकलाई उद्धार, संरक्षण, उपचार र अन्ततः परिवार र समाजसँग पुनर्मिलन गराउने अभियान निरन्तर सञ्चालन गर्दै आएको छ। गोपाल तिमिल्सिनाको जीवनमा आएको परिवर्तन पनि यही अभियानको एक अर्काे प्रेरणादायी उदाहरण हाे ।
-1751784432.jpg)
-1747554144.jpg)
