बागलुङ । मानवसेवा आश्रम बागलुङ शाखाको भवन निर्माण सहयोगार्थ निरयघाटमा जारी श्रीमद् भागवत सप्ताह ज्ञानविज्ञान महायज्ञमा आयोजना गरिएको आर्ट अफ ह्यापिनेस विशेष प्रशिक्षण कार्यक्रम शनिबार सफलतापूर्वक सम्पन्न भएको छ।
कार्तिक २९ गते बिहान ७ बजेबाट सुरु भएको सो प्रशिक्षण कार्यक्रम दिउँसो २ बजेसम्म निरन्तर सञ्चालन भएकाे थियाे। ७ घण्टासम्म चलेको उक्त सत्रमा जीवनशैली, अनुशासन र मानसिक स्वास्थ्य बारे गहन सन्देशहरू प्रदान गरियो।
कार्यक्रममा योगगुरु ललित शंकर योगी तथा मानवसेवा आश्रमका केन्द्रीय अध्यक्ष रामजी अधिकारीले आर्ट अफ ह्यापिनेसका मूल तत्त्व, सकारात्मक सोच, आत्म–अनुशासन, तनाव व्यवस्थापन, मनो–दृष्टिकोण र हर्ष–उल्लासपूर्ण जीवन जीउनका महत्त्वपूर्ण उपायहरूबारे सहभागीहरूलाई प्रशिक्षण दिनुभयो।
यस कार्यक्रममा बागलुङ, पर्वत र म्याग्दी जिल्लाका विभिन्न विद्यालयका शिक्षकहरू, उद्योग वाणिज्य संघका पदाधिकारी तथा सदस्यहरू, सामाजिक, सरकारी तथा गैरसरकारी संस्थामा कार्यरत कर्मचारीहरू, साथै जनप्रतिनिधिहरूको उल्लेखनीय सहभागिता रहेको थियो।
आयोजक समितिका अनुसार कार्यक्रममा १ हजार भन्दाबढी व्यक्तिहरूको उपस्थिति रहँदा महायज्ञ पण्डाल स्थलमा उत्साह थपेको थियाे ।
समाज, मन र विचारलाई सकारात्मक दिशातर्फ प्रेरित गर्ने उद्देश्यले महायज्ञमा प्रशिक्षण कार्यक्रम सञ्चालन गरिएको मानवसेवा आश्रमले जनाएको छ। महायज्ञको समापन दिनको अवसर पारेर आयोजना गरिएको यस कार्यक्रमले सहभागीहरूमा आत्मअवलोकन, जीवन–संयम र सकारात्मक साेच, सामाजिक रूपान्तरणतर्फ उन्मुख गराउने अपेक्षा गरिएको छ।
-1751784432.jpg)
-1747554144.jpg)
