बागलुङ । मानवसेवा आश्रम बागलुङ शाखाको भवन निर्माण सहयोगार्थ निरयघाटमा जारी श्रीमद् भागवत सप्ताह ज्ञानविज्ञान महायज्ञमा शुक्रबार मात्र १ करोड ३५ लाख रुपैयाँ संकलन भएको छ। महायज्ञ सुरु भएसँगै दैनिक रूपमा बढ्दो दान–सहयोगले आयोजनाप्रति भक्तजनहरूकाे उच्च विश्वास र मानवसेवा अभियानप्रतिको समर्पण झल्काएको आयोजकले जनाएको छ।
धार्मिक भावना र मानवीय सहयोगभावनाले प्रेरित भक्तजनको भीडले निरयघाट क्षेत्र शुक्रबार बिहानैदेखि नै चहकिलो बनेको थियो। कथावाचक पण्डितद्वारा प्रस्तुत आध्यात्मिक प्रवचन, वेद–पुराणका शिक्षाहरू र जीवन सम्बन्धी संदेशले वातावरणलाई थप भावनात्मक तथा प्रेरणादायी बनाएको सहभागीताबाट प्रष्ट हुन्छ ।
दैनिक रूपमा १ हजारदेखि लाखौँ रुपैयाँसम्म सहयोग आएसँगै महायज्ञस्थल विगत सात दिनदेखि धार्मिक उत्साहले भरिएको छ। बागलुङ, पर्वत, म्याग्दी लगायतका जिल्लाबाट आएका भक्तजन तथा देश–विदेशमा रहेका नेपालीहरूबाट पनि उल्लेखनीय सहयोग आइरहेको छ। कतिपय दाताहरूले आफ्ना दिवंगत परिवारजनको स्मृतिमा, कसैले सामूहिक प्रयासमा, भने कोहीले संस्थागत रूपमा सहयोग गरेका छन्।
आयोजक समितिका अनुसार महायज्ञमा संकलित रकम मानवसेवा आश्रम बागलुङ शाखाले निर्माण गर्दै आएको भवन तथा संरचना विस्तारका लागि खर्च गरिनेछ। आश्रमले विगतदेखि नै विपन्न, अपांग, असहाय तथा घरबारविहीन नागरिकलाई उद्धार तथा पारिवारिक पुनर्मिलनमा महत्वपूर्ण भूमिका खेलेको भन्दै दाताहरूले सहयोगको हात फैलाएका हुन्।
समापन समारोहमा विशेष पूजा, सम्मान कार्यक्रम, दानदातालाई प्रशंसापत्र वितरण गरिनेछ । यस वर्षको महायज्ञले मानवसेवा आश्रमको संरचनागत विकासमा महत्वपूर्ण योगदान पुर्याउने मात्र नभई, क्षेत्रीय एकता, सेवा भावना र धार्मिक संस्कृतिको प्रवर्द्धनमा पनि टेवा पुगेको छ ।
निरन्तर भक्तिभावका बीच सञ्चालन भइरहेको महायज्ञको औपचारिक समापन कार्यक्रम शनिबार भव्य रूपमा सम्पन्न गरिनेछ।
-1751784432.jpg)
-1747554144.jpg)
