बागलुङ । मानवसेवा आश्रम बागलुङ शाखाको भवन निर्माण सहयोगार्थ बागलुङको निरयघाटमा जारी श्रीमद् भागवत सप्ताह ज्ञानविज्ञान महायज्ञमा बिहीबार १ करोड ६५ लाख रुपैयाँ दान प्राप्त भएको छ।
महायज्ञमा व्यक्तिगत तथा संस्थागत रूपमा १ हजारदेखि ११ लाख रुपैयाँसम्म दान गरिएको आश्रमको वित्त विभागले जनाएको छ। विदेशमा रहेका नेपाली मानवताप्रेमी नेपाली दाताहरूले पनि निरन्तर सहयोग प्रदान गरिरहेका छन्।
आश्रमप्रति भक्तजनहरूले देखाएको माया र विश्वासका कारण सहयोग गर्ने क्रम दिनप्रतिदिन बढ्दै गएको आयोजक समितिले जनाएको छ।
महायज्ञमा बागलुङ, पर्वत, म्याग्दीका साथै देश–विदेशमा रहेका नेपालीहरूले आर्थिक र आत्मिक रूपमा योगदान दिइरहेका छन् ।
स्थानीय समुदाय, उद्योगी–व्यवसायी, संघ–संस्था र जनप्रतिनिधिहरूको उल्लेखनीय उपस्थिति रहेको महायज्ञमा भक्तजनहरूको उत्साह दिनानुदिन बढ्दो छ।
मानवसेवा आश्रमका अध्यक्ष रामजी अधिकारीकाअनुसार भक्तजनहरूको अभूतपूर्व सहयोगले आश्रमको सेवाधर्मलाई थप सशक्त बनाउने ऊर्जा प्रदान गरेको छ।
भक्तजनको उत्साह र भीड बढेपछि २८ गते सकिने भनिएको महायज्ञ एक दिन थप भई २९ गतेसम्म सञ्चालन हुने भएको छ। भक्तजन र श्रद्धालुहरूको आग्रहमा यज्ञ मूल आयोजक समितिले उक्त निर्णय गरेको हो।
-1751784432.jpg)
-1747554144.jpg)
