बागलुङ । मानवसेवा आश्रम बागलुङ शाखाकाे भवन निर्माण गर्ने उद्देश्यले आयोजना गरिएको श्रीमद्भागवत सप्ताह ज्ञानविज्ञान महायज्ञ–२०८२ बागलुङ नगरपालिका–४, निरयघाटमा आजदेखि विधिवत् रूपमा सुरु भएकाे छ।
कार्यक्रमका प्रमुख अतिथि नेपाल उद्योग वाणिज्य महासंघका अध्यक्ष चन्द्र ढकालले दीप प्रज्वलन गर्दै महायज्ञको उद्घाटन गर्नुभएको हो।
उद्घाटन कार्यक्रम सुरु हुनुअघि भव्य शोभा शलश यात्राको आयोजना गरिएको थियो। यात्रामा विभिन्न समाजसेवी संघसंस्था, महिला समूह, युवा क्लब, धार्मिक समुदाय, विद्यालय र स्थानीय बासिन्दाहरूको उल्लेखनीय सहभागिता रहेको थियो। बाजागाजा, झाँकीसहित झण्डा फहराउँदै निकालेको शोभा कलश यात्रा बागलुङ बजारका विभिन्न क्षेत्रकाे परिक्रमा गर्दै महायज्ञ स्थलमा पुगेर समापन गरिएको थियो।
शोभा कलश यात्राको समापनपछि १०:३० बजे महायज्ञको विधिवत् उद्घाटन गरिएको हो।
समारोहमा जिल्ला समन्वय समिति बागलुङका प्रमुख अमर थापा, बागलुङका प्रमुख जिल्ला अधिकारी कुमानसिंह गुरुङ, सहायक प्रमुख जिल्ला अधिकारी पुष्पराज पौडेल, जिल्ला प्रहरी प्रमुख, सशस्त्र प्रहरी प्रमुख, नेपाली सेनाका प्रतिनिधि, विभिन्न नगरपालिका तथा गाउँपालिकाका जनप्रतिनिधि, उद्योगी–व्यवसायी, समाजसेवी, पत्रकार र स्थानीय श्रद्धालुहरू लगायतकाे उपस्थित रहेकाे थियाे ।
महायज्ञमा याेग शिविर, कथा वाचन, भजनकीर्तन, धार्मिक प्रवचन, सांस्कृतिक कार्यक्रम तथा सम्मान कार्यक्रमहरू सञ्चालन गरिनेछ।
मूल आयोजक समितिकाअनुसार महायज्ञबाट संकलित सहयोग रकम मानवसेवा आश्रम बागलुङ शाखाको भवन निर्माणमा र अक्षयकाेष श्रीवृद्धिमा सदुपयाेग गर्दै आश्रमले सडकमा बेवारिसे अवस्थामा रहेका नागरिकहरूको व्यवस्थापनमा लागि खर्च गरिनेछ ।
प्रमुख अतिथि ढकालले समाजमा मानवसेवाको भावना जगाउने यस्ता धार्मिक तथा परोपकारी कार्यक्रमहरूले समुदायमा सकारात्मक सन्देश फैलाउने बताउनुभयो। उहाँले मानवसेवा आश्रमले गरिरहेको कार्यको प्रशंसा गर्दै यस अभियानमा निरन्तर साथ र सहयोगको प्रतिबद्धता व्यक्त गर्नुभयो।
कार्यक्रमका अध्यक्ष तथा यज्ञ संयाेजक सहदेव राजभण्डारीले सबै सहभागी र सहयोगीहरूलाई धन्यवाद ज्ञापन गर्दै कार्यक्रम समापन गर्नुभएकाे थियाे ।
मानवसेवा आश्रम बागलुङ शाखाको भवन निर्माणका लागि आयोजना गरिएको यो महायज्ञ कार्तिक २१ गतेदेखि २८ गतेसम्म चल्नेछ।
-1751784432.jpg)
-1747554144.jpg)
