बागलुङ, कार्तिक
मानवसेवा आश्रम बागलुङले आयोजना गर्न लागेको श्रीमद् भागवत ज्ञान विज्ञान महायज्ञ-२०८२ को तयारी तीव्र रूपमा अघि बढेको छ। सचिवालयका अनुसार महायज्ञको तयारीसँगै प्रचारप्रसार, जनसम्पर्क, सदस्यता वितरण र सहयोग संकलनका कार्यहरूलाई योजनाबद्ध र प्रभावकारी रूपमा अघि बढाइँदै छ।
मानवसेवा आश्रमका परिकल्पनाकार तथा संस्थापक अध्यक्ष रामजी अधिकारीज्यूको नेतृत्वमा बागलुङ, म्याग्दी र पर्वत जिल्लाका विभिन्न सामाजिक संस्था, सरकारी तथा गैरसरकारी संघसंस्था, पत्रकार, सामाजिक र राजनीतिक व्यक्तिहरूसँग निरन्तर भेटघाट र विचारविमर्श भइरहेका छन्। भेटघाटमा सहभागीहरूले आश्रमको निस्वार्थ मानवीय सेवाप्रति उच्च सम्मान प्रकट गर्दै आगामी महायज्ञ सफल होस् भन्ने शुभकामना दिएका छन्।
मानवसेवा आश्रमले बागलुङ, म्याग्दीका प्रमुख सरोकारवालासँग स्नेहमिलन कार्यक्रम सम्पन्न गरेको थियो। उक्त कार्यक्रममा जिल्ला समन्वय समितिका प्रतिनिधि, जनप्रतिनिधि, समाजसेवी, शिक्षक, व्यापारी, सञ्चारकर्मी लगायतको उल्लेखनीय सहभागिता रहेको थियो। भने १७ गते पर्वत जिल्लामा बाग्लुङ र म्याग्दीमा जस्तै प्रमुख सरकारवाला निकायसँग विचारविमर्श गर्ने कार्यक्रम राखेको छ।
मूल समारोह समितिका महासचिव युक्तप्रसाद सुवेदीका अनुसार सचिवालयले महायज्ञ तयारीलाई व्यवस्थित, पारदर्शी र प्रभावकारी बनाउन विशेष योजना सहित काम गरिरहेको छ। म्याग्दी, पर्वत र बागलुङका विभिन्न स्थानीय तहहरूमा पनि जानकारीमूलक कार्यक्रमहरू सञ्चालन भइरहेका छन्। आज मात्रै म्याग्दीको बेनी बजारमा भजन टोली सहित घरदैलो कार्यक्रम सम्पन्न भएको छ, जसमा स्थानीयको उत्साहजनक सहभागिता देखिएको थियो।
प्रचारप्रसारकै क्रममा कार्तिक १२ गते बागलुङ नगर क्षेत्रमा अटो र्याली (प्रभातफेरी) आयोजना गरिएको थियो। र्यालीमा अटो चालकहरू निःशुल्क रूपमा सहभागी भएका थिए। सो अवसरमा आश्रमका अभियन्ताहरूले महायज्ञबारे जानकारीसहित जनचेतनामूलक सन्देश प्रचार गरेका थिए।
महायज्ञकै तयारीसँगै विभिन्न विद्यालय, सामाजिक संस्था, सरकारी तथा गैरसरकारी कार्यालयहरूमा संस्थापक अध्यक्ष रामजी अधिकारीज्यू स्वयं उपस्थित भई “सकारात्मक सोच र मानवीय जीवन दृष्टिकोण” सम्बन्धी प्रेरणादायी तालिमहरू सञ्चालन गरिरहेका छन्। सहभागीहरूले उहाँका सन्देशले समाजमा सेवा, सहयोग र सकारात्मक सोच फैलाउन प्रेरणा मिलेको बताएका छन्।
मानवसेवा आश्रम बागलुङले साविक धौलागिरी अञ्चललाई आफ्नो कार्यक्षेत्र बनाएको छ। हाल आश्रममा ६४ जना सहयोगापेक्षीहरू (घरबारविहीन, असहाय, बिरामी तथा मानसिक असन्तुलन भएका व्यक्ति) आश्रित छन्। उनीहरूको पालनपोषण, उपचार र रेखदेखमा मासिक १० लाख रुपैयाँभन्दा बढी खर्च हुने गरेको आश्रमले जनाएको छ।
दुई सय जना सहयोगापेक्षीलाई सेवा प्रदान गर्न सकिने भवन निर्माण र अक्षयकोष सुदृढीकरणका उद्देश्यले महायज्ञ आयोजना गर्न लागिएको हो। निर्माण उपभोक्ता समितिका अनुसार भवन निर्माणमा हालसम्म ५ करोड रुपैयाँ खर्च भइसकेको र निर्माण कार्य पूरा गर्नका लागि अझै करिब ४ करोड रुपैयाँ आवश्यक रहेको छ।
महायज्ञमार्फत आवश्यक रकम संकलन गरी भवन निर्माण कार्यलाई अन्तिम चरणमा पुर्याउने र दीर्घकालीन व्यवस्थापनका लागि स्थायी कोष स्थापना गर्ने लक्ष्य राखिएको आश्रमले जनाएको छ। प्रचारप्रसारका क्रममा भेटिएका अधिकांश व्यक्तिहरूले आश्रमको सेवाभाव र कार्यशैलीप्रति प्रशंसा व्यक्त गर्दै सहयोग र सहभागिताको प्रतिबद्धता जनाएका छन्।
आश्रमका पदाधिकारीहरूका अनुसार यो महायज्ञ केवल धार्मिक कार्यक्रम मात्र नभई समाजमा मानवता, सेवा र सकारात्मक सोच फैलाउने अभियानका रूपमा अघि बढाइनेछ।
-1751784432.jpg)
-1747554144.jpg)
